Taɛcurt
From Wikipedia, the free encyclopedia
Taɛcurt d ass wis mraw di waggur amenzu n Muḥerrem deg wazemez n yinselmen. Ɣer yinselmen isunniyen d ass ameqqran ideg d-smektayen tuffɣa n yimceyyeɛ Musa d udayen yumnen yis seg tmurt n Maṣer d uɣraq n Ferɛun aɛdaw n Rebbi deg yilel azewwaɣ i yefreq Musa s usɣar-is d ass ideg id-smektayen illu-nsen d wayen i yezmer ad yexdem. Ma ɣer yiciɛeiyen d ass n leḥzen imi d ass ideg yettwanɣa Lḥusin (mmi-s n mmi-s n yimceyyeɛ Muḥemmed) mmi-s n Ɛli d yelli-s n yimceyyeɛ Faṭima deg tnegluft n Karbala ula d ɣer isunniyen lmut n Lḥusin tettwaḥseb d lexṣara tameqqrant i usɣan-nsen ula d nutni imi ttamnen belli Lḥusin d mass n yilmeẓyen n lǧennet.
Ɣer cciɛa ass n taɛcurt yettas-d s tmeẓriwt n yiẓekwan n yiwudam n ubrid-nsen kra ttawḍen ɣer tiyita n yiman-nsen d usizzel n yidammen -nsen imi ttwalinn imian-nsen d ixeddaɛen n Lḥusin. Ɣer yisunniyen ttuẓumen kraḍ n wussan imi d-yeǧǧa yimceyyeɛ Muḥemmed awal-is : ass send taɛcurt, d taɛcurt d wass ara d-yasen s deffir-s: Xas akken tuẓamin n taɛcurt macci d lwaǧeb, maca asɣan iḥemmel mliḥ wid i tt-ixeddmen. Kra n tmura akka am Lezzayer d Lmerrtuk taɛcurt ttqabalen-tt s usewwi n lmakla n wass-nni kan s usuter n tmellalin s wurar d tuffɣiwin ɣer lemqamat d temɛemmrin ay-a imyussanen n wajjed ugin-t imi ccerk s Rebbi. Tikwal taɛcurt tettili-d i usebgen n tsertit n tmurt akken iḍerru yal aseggas deg Iran ideg tineslemt taciɛit i d asɣan unṣib n tmurt, ɣef way-a tikwal iḍerru-d umennuɣ s ifassen deg tmura yeǧǧamaɛen snat n tmettiyin taciɛit d tsunnit akka am Lɛiraq d Pakistan