Sun Myung Moon
kóreskur trúarleiðtogi (1920–2012) / From Wikipedia, the free encyclopedia
Sun Myung Moon (6. janúar 1920 – 3. september 2012) var suður-kóreskur trúarleiðtogi sem var jafnframt þekktur fyrir viðskiptaumsvif sín og stuðning sinn við ýmsa pólitíska málstaði. Moon var stofnandi og andlegur leiðtogi Sameiningarkirkjunnar, kristins söfnuðar sem gekk út á þá trúarkenningu að Moon sjálfur væri nýr Messías sem hefði verið falið að ljúka hjálpræðisverkinu sem Jesú mistókst að vinna fyrir 2000 árum. Fylgismenn Moons eru gjarnan kallaðir „Moonistar“ (e. Moonies).
Sun Myung Moon 문선명 | |
---|---|
Fæddur | 6. janúar 1920 |
Dáinn | 3. september 2012 (92 ára) |
Þjóðerni | Suður-kóreskur |
Menntun | Waseda-háskóli |
Þekktur fyrir | Að stofna og leiða Sameiningarkirkjuna |
Maki | Choi Sun-kil (g. 1945; sk. 1957) Hak Ja Han (g. 1960) |
Börn | 16 |
Með framlögum fylgjenda sinna gerði Moon Sameiningarkirkjuna að viðskiptalegu stórveldi og varð sjálfur vellauðugur. Hann kom sér jafnframt í samband við marga valdsmenn og þjóðarleiðtoga á borð við Richard Nixon, George H. W. Bush, Míkhaíl Gorbatsjov og Kim Il-sung. Söfnuður Moons hefur ætíð verið umdeildur og gagnrýnendur hans líta jafnan á hann sem sértrúarsöfnuð sem heilaþvær og féflettir meðlimi sína. Moon sjálfur var um skeið fangelsaður fyrir skattsvik á níunda áratugnum.