Badajoz
From Wikipedia, the free encyclopedia
Badajoz esas la chefurbo di la provinco Badajoz en la autonoma komunitato Extremadura, Hispania.
Ol situesas proxim la frontiero kun Portugal, an la sinistra rivo di la rivero Guadiana. En 2011 ol havis 151 565 habitanti.
Konquestita dal islamani en la 8ma yarcento, Badajoz divenis Mohamedana rejio, la Taifa di Badajoz. Pos la reconquista, l'areo disputesis inter Hispania e Portugal dum plura yarcenti, to quo rezultis en plura militi, inkluzanta la Hispana Sucedo-Milito (1705), la Peninsulala Milito (1808–1811), la Siejo di Badajoz (1812), e la Hispana Interna Milito (1936). Hispana historio reflektesas en la urbo.
Badajoz esas la sideyo dil Katolika Arkidiocezo Mérida-Badajoz. Ante la kombino di la Diocezo Mérida e Diocezo Badajoz, Badajoz esis la sideyo dil Diocezo Badajoz de la komenco dil episkopio en 1255. La urbo esas kelke eminenta, "kronizita" da la ruinuri di islamana kastelo, e superregardanta la rivero Guadiana, qua fluas inter la kastelo-kolino e la potente armizita fuorto San Cristobal.
L'arkitekturo di Badajoz indikas olua tempestoza historio; mem Badajoz-Katedralo, konstruktita en 1238, similesas fortreso, pro sua enorma muri. Badajoz esas hemo di la futbalo-klubi CD Badajoz ed AD Cerro de Reyes, e la basketbal-klubo AB Pacense. Ol servesas da Fervoyo-Staciono Badajoz e Badajoz-Aeroportuo.