The Da Vinci Code (film)
From Wikipedia, the free encyclopedia
The Da Vinci Code is in Amerikaansk-Malteesk-Frânsk-Britske detektiveskriller út 2006 ûnder rezjy fan Ron Howard, mei yn 'e haadrollen Tom Hanks en Audrey Tautou. De titel betsjut "De Da Vinci-koade". De film is basearre op 'e roman mei deselde namme fan Dan Brown. It ferhaal folget Robert Langdon, in Amerikaanske professor yn 'e symbology, dy't yn Parys de haadfertochte wurdt fan 'e aaklike moard op Jacques Saunière, in konservator fan it Louvre. Plysjefrou Sophie Neveu, de pakesizzer fan Saunière, leaut net dat Langdon de moardner is en tegearre naaie se út om 'e saak sels te ûndersykjen. It docht bliken dat Saunière behelle wie yn djip geheime saken binnen de Roomsk-Katolike Tsjerke, en it ûndersyk mûnet út yn in syktocht nei de Hillige Graal.
The Da Vinci Code | ||
film | ||
(Filmposter yn 'e Ingelske Wikipedy) | ||
makkers | ||
regisseur | Ron Howard | |
produsint | Brian Grazer John Calley | |
senario | Akiva Goldsman | |
basearre op | de roman fan Dan Brown | |
kamerarezjy | Salvatore Totino | |
muzyk | Hans Zimmer | |
filmstudio | Columbia Pictures Imagine Entertainment Skylark Productions oerheid fan Malta | |
distribúsje | Sony Pictures Releasing | |
spilers | ||
haadrollen | Tom Hanks Audrey Tautou | |
byrollen | Ian McKellen Paul Bettany Jean Reno Alfred Molina | |
skaaimerken | ||
lân/lannen | Feriene Steaten Malta Frankryk Feriene Keninkryk | |
premiêre | 17 maaie 2006 | |
foarm | langspylfilm | |
sjenre | detektiveskriller | |
taal | Ingelsk (ek wat Frânsk en Latyn) | |
spyltiid | 149 minuten | |
budget en resultaten | ||
budget | $125 miljoen | |
opbringst | $760,2 miljoen | |
filmsearje | ||
filmsearje | Robert Langdon | |
● folgjend diel | Angels & Demons |
The Da Vinci Code krige fan 'e filmkritisy oer it algemien negative resinsjes. Krekt as it boek earder oerkommen wie, stie de film bleat oan tige hurde krityk fan 'e Roomsk-Katolike Tsjerke. The Da Vinci Code waard yn in relatyf grut tal lannen en territoaria ferbean, mar wie in reuseftich kommersjeel súkses yn 'e bioskopen yn oare lannen en groeide út ta de op ien nei meast opbringende film fan 2006. It súkses late ta de ferfilming fan twa oare romans fan Dan Brown oer deselde haadpersoan yn wat de Robert Langdon-filmsearje kaam te hjitten. It direkte ferfolch op The Da Vinci Code wie Angels & Demons út 2009.