Robert Redford
From Wikipedia, the free encyclopedia
Robert Redford (folút: Charles Robert Redford jr.; Santa Monica, 18 augustus 1936) is in rêstend Amerikaansk akteur, regisseur, filmprodusint en sakeman. Hy sette yn 1959 útein mei in karriêre as tillefyzje-akteur, en stie yn dy snuorje ek in protte op 'e planken. Redford briek yn 1969 troch as filmakteur mei syn haadrol yn 'e western Butch Cassidy and the Sundance Kid. Neitiid hied er yn 'e 1970-er jierren in protte súkses mei rollen yn kaskreakers as Jeremiah Johnson, The Sting en All the President's Men. Hy wie behelle yn 'e oprjochting fan it Sundance Filmfestival yn Utah en ferbûn dêr desennia lang syn namme oan.
Robert Redford | ||
akteur | ||
Robert Redford yn 2012 | ||
persoanlike bysûnderheden | ||
echte namme | Charles Robert Redford jr. | |
nasjonaliteit | Amerikaansk | |
berne | 18 augustus 1936 | |
berteplak | Santa Monica (Kalifornje) | |
etnisiteit | Iersk Ingelsk Skotsk Ulstersk | |
jierren aktyf | 1959 – 2018 | |
prizen | BAFTA 1969 Oscar 1980 Golden Globe 1965, 1980 Cecil B. DeMille Award 1994 SAG Award 1995 Eare-Oscar 2001 Légion d'Honneur 2010 Pres. Frijheidsmedalje 2016 Gouden Eareliuw 2017 | |
offisjele webside | ||
sundance.org |
Syn rezjydebút, de film Ordinary People, út 1980, wie in ûnbidich súkses en smiet him de Oscar foar bêste regisseur op. Oare ferneamde films dêr't Redford yn spile, wiene The Way We Were, Three Days of the Condor, Out of Africa, Indecent Proposal, The Horse Whisperer en An Unfinished Life. As regisseur wied er ek belutsen by The Milagro Beanfield War, A River Runs Throught It en The Horse Whisperer. Yn syn hast sechstichjierrige karriêre wûn Redford twa Oscars (ynkl. de Eare-Oscar), trije Golden Globes (ynkl. de Cecil B. DeMille Award foar syn oeuvre), in BAFTA en in Screen Actors Guild Award. Ek waard er yn 2010 opnommen yn it Frânske Légion d'Honneur en ûntfong er yn 2016 de Presidinsjele Frijheidsmedalje. Yn 2018 makke Redford bekend dat er ophold mei wurkjen.