कैनियन
खड़ा ढाल वाली चट्टानन के बीचा में नदी कटान से बनल चाकर आ गहिरी घाटी / From Wikipedia, the free encyclopedia
कैनियन (Canyon) भा गॉर्ज (Gorge) एक किस्म के घाटी होला जेकर दुन्नो ओर के ढाल लगभग खड़ा ढाल होलें आ चौड़ाई के अनुपात में गहिराई बहुत ढेर होला। इनहन के गहिरी घाटी, तंग घाटी भा सँकरी घाटी कहल जा सके ला। प्रमुख रूप से अइसन घाटी सभ के निर्माण अपरदन (जमीन कटाव) द्वारा होला जब नदी भा जलधारा घाटी के गहिरा तेजी से करे आ साइड के ढाल के कटाव ओतना तेजी से न होखे।
अंग्रेजी के दुन्नों शब्द कैनियन आ गॉर्ज के अदल-बदल के इस्तेमाल होला आ ई लगभग पर्यावाची हवें। कुछ स्रोत के मोताबिक कैनियन शब्द के इस्तेमाल अमेरिकी अंग्रेजी में ढेर होला आ गौर्ज के इस्तेमाल यूरोप में होला। कुछ जगह इहो देखे के मिले ला कि बड़हन आ बिसाल आकार के गॉर्ज के कैनियन कहल जाला।[1] हिंदी में गॉर्ज के खड्ड आ कैनियन खातिर महाखड्ड शब्द के इस्तेमाल भी मिले ला।[2]
अमेरिका के एरिजोना में कोलोरैडो नदी द्वारा बनावल ग्रैंड कैनियन आ तिब्बत में ब्रह्मपुत्र नदी द्वारा हिमालय के पार करत समय बनावल यारलुंग त्सां पो गॉर्ज दुनिया के परसिद्ध कैनियन भा गॉर्ज हवें। एक ठो परिभाषा के अनुसार काली गंडकी गॉर्ज दुनियाँ के सभसे गहिरी घाटी हवे, हालाँकि ऊँचाई के माप के तरीका अलग होखे पर यारलुंग त्सां पो गॉर्ज सभसे गहिरा आ सभसे बड़ कैनियन भी मानल जाला।