Xuana de Castiella, llamada polos sos adversarios «la Beltranexa» (28 de febreru de 1462, Madrid – 12 d'abril de 1530, Lisboa) foi una infanta castellana, reina proclamada de Castiella y de Llión y reina consorte de Portugal. Destituyida del so rangu, hubo d'arrenunciar por tratáu a tolos sos títulos y señoríos, inclusive a la so calidá d'infanta castellana y d'alteza, quedando llamada oficialmente, por real decretu portugués, «a Escelente Senhora» hasta'l final de la so llarga vida nel exiliu de Portugal. Foi la única fía y heredera d'Enrique IV y de la so segunda esposa la reina Xuana de Portugal, fía d'Eduardo I de Portugal. Una parte de la nobleza castellana nun la aceptó como fía biolóxica del rei'l so padre, a quien acusó d'obligar a la reina —la so muyer— a tener un fíu col so favoritu, Beltrán de la Cueva, primer duque de Alburquerque, a pesar de que dambos xuraren solemnemente que nun fuera asina. Beltrán nun s'atopaba en llugar necesariu pa ello nes feches concretes. Había abarruntes sobre la impotencia d'Enrique IV una y bones primeramente había estáu casáu cola infanta Blanca de Navarra y el matrimoniu declaróse nulu porque nunca llegó a peracabase. Amás, Enrique IV nun tuvo más fíos nin cola so muyer nin con nenguna de los sos amantes.
Datos rápidos Reina consorte de Portugal (es), pretendiente al trono de Castilla (es) ...
Zarrar