Partíu Socialista Vascu
From Wikipedia, the free encyclopedia
Euskal Sozialista Biltzarrea (ESB) —nome vascuenciu traducible al español como «Asamblea Socialista Vasca»— foi un partíu políticu español d'ámbitu vascu-navarru fundáu en 1975, con ideoloxía socialdemócrata non marxista y nacionalista vasca. Al ser llegalizáu en 1977, adoptó en castellán el nome de Partíu Socialista Vascu (PSV). Intentó infructuosamente ocupar l'espaciu políticu asitiáu ente'l PNV y los partíos comunistes nel País Vascu y Navarra, ámbitu ideolóxicu nel que puxaba col PSOE. Trató de crear una amplia coalición eleutoral de tolos partíos nacionalistes, pa lo que participó na Cume de Chiberta.
Partíu Socialista Vascu | |
---|---|
Euskal Sozialista Biltzarrea | |
Fundación | 1975 |
Disolución | 1980 |
Estáu | España |
Ideoloxía política |
Socialdemocracia y nacionalismu vascu; dende 1977, marxismu y independentismu |
Posición nel espectru | Izquierda |
En fracasando nes eleiciones de 1977, radicalizó la so ideoloxía declarándose marxista, participó na Mesa de Alsasua y formó con otros partíos la coalición Herri Batasuna (HB), que llogró un inesperáu ésitu nes eleiciones de 1979. Les diferencies colos sos aliaos alrodiu de la organización interna de HB y la conveniencia o non de participar nes instituciones, fixeron qu'abandonara la coalición a principios de 1980. La incesante perda de militantes sufierta, les gravosas deldes contraíes y l'imposibilidá d'abrir un espaciu políticu estremáu fixeron que sumiera pocu tiempu dempués.