Movimientu antiglobalización
From Wikipedia, the free encyclopedia
El movimientu antiglobalización (tamién nomáu altermundista, alterglobalización o movimientu de resistencia global) ye un movimientu de protesta internacional que refuga'l capitalismu y la globalización impuesta pol modelu neolliberal. Ye un movimientu nel qu'andechen decenes de grupos como; anticapitalistes, ecoloxistes, antimilitaristes, sindicatos, ONG's, indixenistes etc. Estos grupos, ensin ser un movimientu mui bien encadarmáu, nel que nun hai cabezaleros, lleven más d'una década trabayando en cuestiones venceyaes a los problemes que remanecen de la globalización de la economía mundial. Son munches les campañes qu'organizaron pa la condonación de la delda esterna de los países probes, o pal remocique del Bancu Mundial y del FMI.
Magar que tienen una trayeutoria d'años de trabayu, los antiglobalistes acapararon espaciu nos medios de comunicación y dende les instancies internacionales por mor de la presencia de los sos simpatizantes n'actos paralelos a los grandes aconceyamientos económicos y políticos internacionales. La protesta de Seattle, qu'algamó albortar la xunta de la Organización Mundial del Comerciu, supunxo un puntu d'inflexón na historia del movimientu.
L'anuncia de la presencia de más de 50.000 simpatizantes foi reproducida nos medios de comunicación de tol mundu. Les engarradielles qu'ellí asocedieron dieron una imaxe de violencia mui alloñada de los verdaderos oxetivos de los organizadores.