Mogolistán
From Wikipedia, the free encyclopedia
Mogolistán o Mogulistán (en persa: مغولستان ), tamién llamáu kanato Chagatai oriental (chinu simplificáu: 东察合台汗国, pinyin: Dōng Cháhétái Hànguó), ye una área xeográfica histórica alcontrada al norte del cordal de los Tian Shan,[1] na frontera ente Asia Central y Asia Oriental. Esa zona inclúi parte de los actuales países de Kazakstán, Kirguistán y del noroeste de China. Nominalmente l'área foi gobernada por un kanato dende mediaos del sieglu XIV hasta'l sieglu XVII, anque ye discutible si yera una continuación del kanato de Chagatai, un kanato independiente o un estáu tributariu de la dinastía Ming de China.
Nesi momentu, el control local recayía nos mongoles locales Dughlats o nos líderes sufi Naqshbandi nes sos respeutivos ciudaes-oasis. Anque los gobernantes esfrutaben de gran riqueza debíu al comerciu con China, tuvieron acosaos por constantes guerres civiles ya invasiones del imperiu timúrida, que surdiera de la parte occidental del antiguu kanato de Chagatai. Los kanes d'enclín independentista crearon los sos propios dominios en ciudaes como Kashgar y Turfán. Col tiempu'l kanato foi superáu por kirguisos, cazacos y oirates.