Llista de los edificios más altos de la ciudá de Nueva York
artículu de llista de Wikimedia / From Wikipedia, the free encyclopedia
La ciudá de Nueva York, la mayor de los Estaos Xuníos, tien un total de 5.845 high-rises (edificios altos d'usu residencial o pa oficines), de los que 97 miden más de 183 m. El mayor d'ellos, al que se-y punxo'l cumal el 10 de mayu de 2013, ye'l One World Trade Center, qu'entá ta en construcción y que ha ser cuando tea acabáu el mayor del país y terceru mayor del mundu, colos sos 104 pisos y 541 m d'altor. L'edificiu más altu yá completáu de la ciudá ye' Empire State Building. Asitiáu nel Midtown Manhattan, tien 102 pisos y mide 381 m (443 m si incluyimos l'antena). Acabáu en 1931, ye'l cuartu mayor edificiu del país y ventenu terceru del mundu. Foi'l mayor del mundu dende que lu acabaron hasta 1972, cuando acabaron de construyise los 110 pisos de la torre norte del World Trade Center orixinal. Esti foi l'edificiu más altu del mundu hasta que-y quitó'l puestu la Sears Tower (agora nomada Willis Tower), de 108 pisos, acabada de construyir en Chicago en 1974. Cuando un ataque terrorista valtó les torres ximielgues del World Trade Center en 2001 l'Empire State foi otra vuelta'l mayor edificiu de la ciudá. El tercer edificiu mayor de Nueva York ye'l Bank of America Tower, de 366 m d'altor contando l'aguya que lu corona. Empataos pal cuartu puestu tán, con 319 m d'altor caún, el Chrysler Building, que foi'l mayor del mundu ente 1930 y 1931, y el The New York Times Building, inauguráu en 2007.
Los rascacielos de la ciudá concéntrese nel Midtown Manhattan y el Lower Manhattan, magar que los hai tamién notres zones de Manhattan y de los otros distintos de la ciudá. En xineru de 2011 había nel conxuntu la ciudá 228 edificios de más de 152 m d'altor, más qu'en denguna otra ciudá estauxunidense.
Dende 2003 acabáronse 22 edificios de más de 183 m d'altor, y hai otros 14 en construcción. Ente ellos el yá citáu One World Trade Center, que ha ser el mayor de la ciudá. Esti rascacielos ye parte del complexu d'edificios que ha sustituyir les torres valtaes pol atentáu terrorista del 11 de setiembre de 2001. Un complexu que, amás d'elli, ha incluir otros trés rascacielos: el Two World Trade Center (411 m d'altor), el Three World Trade Center (378 m d'altor) y el Four World Trade Center (297 m). Amás d'ellos, en mayu de 2013 taben construyéndose o en proyeutu 205 high-rises na ciudá de Nueva York.