Espedición de Lewis y Clark
From Wikipedia, the free encyclopedia
La espedición de Lewis y Clark foi la primera llevada a cabu por norteamericanos que crució l'oeste del actual Estaos Xuníos. Los espedicionarios partieron de cerca de Saint Louis (Missouri), punxeron aldu oeste y travesaron gran parte d'América del Norte hasta algamar la mariña del océanu Pacíficu.
La espedición foi encargada pol presidente Thomas Jefferson darréu dempués de la compra de Luisiana en 1803. Taba compuesta por un selectu grupu d'oficiales voluntarios del exércitu d'Estaos Xuníos sol mandu del capitán Meriwether Lewis y del so amigu, el subteniente William Clark. El so peligrosu viaxe duró dende mayu de 1804 hasta setiembre de 1806. L'oxetivu principal yera esplorar y cartografiar el territoriu recién adquiríu, abrir una ruta segura al traviés de la metá occidental del continente y establecer presencia d'Estaos Xuníos na estensa zona primero que Gran Bretaña o otros poderes europeos trataren de reclamala.
Los oxetivos secundarios de la espedición yeren científicos y económicos: estudiar la fauna y la flora del territoriu, la so xeografía y l'establecimientu de tratos comerciales colos indíxenes locales. La espedición tornó a Saint Louis cargada de mapes, dibuxos y diarios que fueron presentaos al presidente Jefferson.