Coronación del monarca británicu
From Wikipedia, the free encyclopedia
La coronación del monarca británicu ye una ceremonia[1] por aciu la cual el monarca del Reinu Xuníu y de los Reinos de la Mancomunidá ye formalmente coronáu y investido coles xoyes de la Corona. Les coronaciones fueron cayendo en desusu na mayoría de les monarquíes europees —onde tamién solíen celebrase ceremonies similares— y fueron sustituyíes por formes d'inauguración del reináu más sencielles.
La coronación, ocasión festiva, suel tener llugar dalgunos meses dempués de la muerte del anterior soberanu, una vegada trescurríu'l periodu de llutu. Esti intervalu de tiempu dexa a los organizadores llevar a cabu los aballadores preparativos que rique la ceremonia.[2] Por casu, Isabel II foi coronada el 2 de xunu de 1953, a pesar d'aportar al tronu'l 6 de febreru de 1952, nel mesmu momentu de la muerte del so padre. La llei británica establez que'l tronu nunca queda vacante y que'l nuevu monarca asocede al anterior darréu.[3]
Preside la ceremonia'l arzobispu de Canterbury, xefe espiritual de la Ilesia d'Inglaterra, al qu'asisten los miembros del cleru y de la nobleza que tienen asignáu un papel na coronación. A la mayoría de los participantes esíxese-yos llevar una vistimienta o uniformidá específica. Tamién asisten cargos oficiales del gobiernu y un eleváu númberu d'invitaos, incluyendo xefes d'Estáu y representantes de países estranxeros.[2]
Los elementos esenciales de la coronación permanecieron práuticamente inalteraos mientres los últimos mil años.[2] De primeres, el soberanu ye presentáu y aclamáu pol pueblu. De siguío, xura solemnemente defender la llei y la Ilesia y dempués ye unxíu con aceite, coronáu y investido coles xoyes de la corona. A lo último, recibe l'homenaxe de los sos súbditos.