Autu de fe
From Wikipedia, the free encyclopedia
El autu de fe yera un actu públicu entamáu pola Inquisición nel que los condergaos pol tribunal abjuraban de los sos pecaos y amosaben el so arrepentimientu —lo que faía posible'l so reconciliación cola Ilesia católica— por que sirvieren de lleición a tolos fieles que se rexuntaren na plaza pública o na ilesia onde se celebraba (y a quien se convidaba tamién a que proclamaren solemnemente la so adhesión a la fe católica).
El mentáu yera'l sentíu buscáu del autu de fe, nel que, en contra de lo que suel creese, nun s'executaba a naide, sinón que los condergaos a muerte —los relapsos (reincidentes)— yeren relaxaos al brazu secular, esto ye, apurríos a los tribunales reales que yeren los encargaos de pronunciar la sentencia de muerte —la Inquisición yera un tribunal eclesiásticu y nun podía condergar a la pena capital— y de conducir a los reos al llugar onde diben ser quemaos —esgañaos primeramente si yeren penitentes, y quemaos vivos si yeren impenitentes, esto ye, si nun reconocieren el so herexía o nun se penaben—.
L'autu de fe que se realizaba discretamente nes dependencies de la Inquisición llamábase autillo.