Águila
From Wikipedia, the free encyclopedia
Águila o aigla ye'l nome dau a les mayores aves depredadores. Les diverses especies y subespecies d'águiles pueden atopase en casi cualesquier parte del planeta sacante en L'Antártida. Son miembros de les aves de presa, del orde d'Accipitriformes,[1] (o Falconiformes acorde a una clasificación anterior),[2] familia Accipitridae, subfamilia Buteoninae. Pertenecen a dellos xéneros, que tán suxetos a una reclasificación más fayadiza yá que los espertos nun lleguen a una opinión consensuada. Les águiles caracterícense principalmente pol so gran tamañu, constitución robusta y cabeza y picu pesaos.
Clasificación científica | ||
---|---|---|
Reinu: | Animalia | |
Filu: | Chordata | |
Clas: | Aves | |
Orde: | Accipitriformes | |
Familia: | Accipitridae | |
Subfamilia: | Buteoninae (parcial) | |
Consultes | ||
[editar datos en Wikidata] |
Como toles aves de presa, les águiles tienen un picu grande, poderosu y apuntiáu pa esprender la carne de la so presa. Cunten tamién con tarsos y garres poderoses. Llama tamién l'atención la fuercia de les águiles, que-yos permite alzar en vuelu a preses muncho más pesaes qu'elles. Amás tienen una vista desaxeradamente aguda que-yos dexa visualizar potenciales preses a distancia, por casu l'águila real tien dos puntos focales nos sos güeyos, unu pa mirar de frente y otru p'alcontrar la mirada escontra les bandes achisbando a la distancia.
Les águiles fueron utilizaes por munchos pueblos como símbolu nacional y especialmente símbolu imperial, amosando tanto poderíu como guapura. Del Imperiu romanu ye que, polo xeneral, otros estaos tomaron la forma más avezada del emblema con una águila; l'Imperiu bizantín apurrió'l símbolu de l'águila bicéfala.
L'águila yera sinónimu de poder pa munchos pueblos antiguos como los Mochica del antiguu Perú, mayes y azteques.