تعذيب
From Wikipedia, the free encyclopedia
التعذيب هو الحاق الأذى بالغير عن طريق الوجع. و التعذيب عمل مقصود الغرض منه تأليم جسم الشخص او نفسيته. و ممكن يكون بطريقه فرديه او عن طريق جهاز سلطه فى الدوله. التعذيب ممكن يتقسم لنوعين، الأولانى تعذيب ما بيأديش لموت الضحيه زى زى فى حالات استخلاص الاعترافات او المعلومات ، و التانى تعذيب الغرض منه الاعدام بوحشيه. فى القرن 21 بيعتبر التعذيب وسيله اجراميه ضد مبادىء حقوق الانسان.
الامم المتحده حرمت و جرمت استخدام التعذيب و مضت على وثيقة منع التعذيب 143 دوله. الامم المتحده بتعرف التعذيب بإنه " أى عمل بيسبب للضحيه الم جامد او معاناه جسديه او نفسيه ، وانه بيتمارس ضد الضحيه بغرض زى الحصول منه او من شخص تالت على معلومات او اعتراف على حاجه عملها او فيه احتمال انه عملها هو او طرف تالت ، او لإلحاق الضرر بيه او بطرف تالت لاسباب عنصريه من أى نوع ". من ناحيه تانيه الماده 5 من الاعلان العام لحقوق الانسان بتاع الامم المتحده بيحرم و بيجرم التعذيب. الدول الموقعه على وثيقة جنيف التالته و الرابعه اتعهدوا رسمى بإنهم مش حايستخدموا التعذيب فى الصراعات العسكريه.
على مر العصور استخدم الانسان التعذيب ضد غيره من البشر لأسباب دينيه او سياسيه او عنصريه او حربيه او ساديه او بغرض العقاب و لأسباب تانيه كتيره. و اخترعت الات و ادوات كتيره للتعذيب. فى العصور الوسطى انتشر التعذيب كوسيله للترهيب و العقاب و ذل الخصوم . فى العصور القديمه اتفنن فى عمليات التعذيب ، و فى العصور الوسطى ظهرت محاكم التفتيش التابعه للكنيسه الكاتوليكيه فى اوروبا اللى استخدمت افظع انواع التعذيب للضحايا و طورت ادوات و الات للتعذيب ، و مع اكتشاف العالم الجديد و انتشار الإستعمار الاوروبى فى نواحى العالم استخدم التعذيب و التنكيل بطريقه شنيعه ضد سكان المناطق المكتشفه و المستعمره فى امريكا الجنوبيه و اسيا و افريقيا و غيرها. فى العصر الحديث برغم القوانين الدوليه المحرمه استمر التعذيب و التنكيل بالناس عن طريق حكومات ، و حصلت فظايع تعذيب فى العراق بعد الغزو الامريكى فى السجون و المعتقلات زى سجن ابو غريب فى بغداد. و لحد على المستوى الفردى بره نطاق الحكومات و السلطات استمرت عمليات الإعتداء على ادمية البشر و التنكيل بيهم بإستخدام التعذيب زى ما حصل للخدامين و منهم الضحيه السريلانكيه تى ارياواثى اللى اظهرت الاشعه انه اتدق فى جسمها 24 مسمار عن طريق مخدومها. ضرب التلامذه فى المدارس عن طريق المدرسين بطبيعة الحال هو كمان تعذيب و منتشر فى كذا بلد بحجة تربية و تقويم التلاميذ مع انه من ابشع وسايل التنكيل و التعذيب لانه كمان بيرتكب عن طريق كبار ضد اطفال.