Technischi Kataschtrophe
From Wikipedia, the free encyclopedia
Technischi Kataschtrophe nennt me es Kataschtrophe-Ereignis, wo us technische Gründ entschtande isch, im Gegesatz zu Naturkataschtrophe, wo d Ursach natüürlig isch. Es hett als Kriterium e Dimension, wo die regionale Rettigschräft vom Kataschtropheschutz vo ihrer Kapazität her überforderet sii. I de meischte Fäll forderet das Ereignis grad wenn s passiert e höchi Azahl vo Todesopfer. S gitt aber au Uusnahme, wie d Kataschtrophe vom Chärnchraftwärk Fukuschima oder d Kataschtrophe vom Chärnchraftwärk Tschernobyl, wo erscht mit viile längerfrischtige Todesfäll, v. a. dur Chräbs z rächne isch; wo aber au als Kataschtrophe-Ereignis gälte.
Die wichtigschte Technik-Kataschtrophe bislang si gsii: En Kaskade-Bruch vo 62 Schtaudämm 1975 in der chinesische Provinz Henan, wo rund 85'000 Mänsche drbii umchoo sii und d Chemiekataschtrophe vo Bhopal 1984 in Indie, wo dr direkt Kontakt mit dr Gaswulche nach verschiidene Schätzige 3'800 bis 25'000 Toti gforderet het un bis zu 500'000 Verletzti, wo zum Teil bis hüüt an de Folge liide. In Europa isch s d Kataschtrophe vo Vajont in Norditalie vo 1963 gsii, en Überfluetig vom ene Schtaudamm dur ne Bärgschturz mit rund 2'000 Todesopfer.