s Chanat vo de Chasare
From Wikipedia, the free encyclopedia
S Chanat vo de Chasare isch en unabhängige Staat im nördlige Kaukasus an dr Küste vom Kaspische Meer gsi. Er isch im 7. Joorhundert noch dr Zitwändi vom Volk vo de Chasare gründet worde. Vom 8. Joorhundert aa het die chasarischi Ooberschicht die jüdischi Religioon aagnoo. Öb das au s Volk gmacht het, isch umstritte. Es isch überliiferet, ass es under de Chasare au Christe und Muslim gee het. S Chanat vo de Chasare isch e wichdige Bündnispartner vom Byzantinische Riich in sim Kampf gege s Sassanideriich und die arabische Kalifat gsi. Es isch Dank em Färnhandel zun ere bedütende Regionaalmacht worde und het uf em Höhepunkt vo siner Macht groossi Däil vom hütige Südrussland, dr Weste vom spöötere Kasachstan, d Ostukraine, Däil vom Kaukasus und d Krimhalbinsle beherrscht. Im früeje 10. Joorhundert isch d Allianz mit Byzanz brüchig worde und es isch zu Usenandersetzige uf dr Krim cho. D Macht vo de Chasare isch in de 960er Joor vo de Kiewer Rus, wo vilmol vo Byzanz understützt worde si, broche worde. Die chasarische Festige vo Sarkel und Tamatarcha si 965 an d Rus gfalle, und 967 oder 969 häi si d Hauptstadt Itil erooberet. D Chasare si denn witgehend us dr Gschicht verschwunde.